अन्तर्राष्ट्रिय जैविक विविधता दिवस आज, रुकुमको रन्मामैकोटमा यार्सागुम्बा महोत्सव

काठमाडौं, ९ जेठ । 
अन्तर्राष्ट्रिय जैविक विविधता दिवस आज,  नेपालमा पनि विभिन्न कार्यक्रम गरी मनाईँंदैछ । जैविक विविधताका मुद्धाप्रतिको बुझाई र सचेतना वृद्धि गर्ने उद्धेश्यले संयुक्त राष्ट्रसंघको आव्हानमा हरेक वर्ष मे २२ तारिखमा यो  दिवस मनाउने गरिएको छ ।  दीगो जीविकोपार्जनका लागि जैविक विविधताको मूलप्रवाहीकरण गरौं भन्ने नाराका साथ मनाईने दिवसको मूल कार्यक्रम यो वर्ष रुकुममा आयोजना गरिएको छ । वन तथा भू संरक्षण मन्त्रालयको समन्वयमा बहुमुल्य जडीबुटी यार्सागुम्बाको संरक्षणमा योगदान पु¥याउने उद्धेश्यले रुकुमको रन्मामैकोटमा यार्सागुम्बा महोत्सव सहितका कार्यक्रम आयोजना गरिएको मन्त्रालयका सूचना अधिकृत यज्ञनाथ दाहालले जानकारी दिनुभयो । महोत्सव एक महिना सम्म सन्चालन हुनेछ ।

दिवसका अवसरमा सन्देश दिंदै संयुक्त राष्ट्रसंघका महासचिव बान की मूनले दीगो विकासका लागि प्राकृतिक श्रोतको जिम्मेवार प्रयोग महत्वपूर्ण रहेको भन्दै जैविक विविधताको मूलप्रवाहीकरणले विकासका आवश्यकताको सम्बोधन तथा वातावरणको संरक्षण सुनिश्चित गर्ने बताउनुभएको  छ । उहाँले सबै सरोकारवालालाई वर्तमान र भावी पुस्ताका लागि पृथ्वीको विविधताको संरक्षण र दीगो व्यवस्थापनमा ध्यान दिन आग्रह गर्नुभएको छ । जैविक विविधताको मूलप्रवाहिकरणमा विश्वव्यापी ध्यान केन्द्रित गराउने उद्धेश्यले संयुक्त राष्ट्रसंघको आव्हानमा जैविक विविधता सम्बन्धि सन्धिका पक्ष राष्ट्रहरुको सम्मेलन आउँदो डिसेम्बरमा मेक्सिकोको कानकुनमा गर्ने तयारी छ ।