संविधानजारी गर्ने भव्य तयारी, बेलुकीसम्म सजावटको काम सकिने
काठमाडौं, २ असोज । नयाँ संविधान सार्वजनिक गर्ने विशेष समारोहका लागि संविधानसभा सचिवालयले तयारी थालेको छ । भोली संविधानसभा भवन नयाँ बानेश्वरमा हुने विशेष समारोहका लागि सजावटको काम भैरहेको संविधानसभा सचिवालयका सहायक प्रवक्ता सुदर्शन कुँइकेलले बताउनु भयो । आज बेलुकीसम्ममा सजावट लगायतका तयारी सकिनेछ । नेपालको संविधान २०७२ लाई ५ सय ३७ सभासद्को हस्ताक्षरपछि हिजो संविधानसभा अध्यक्ष सुवासचन्द्र नेम्वाङ्गले प्रमाणित गर्नु भएको थियो । संविधानको विधेयक अध्यक्षद्वारा प्रमाणित भएपछि हिजोनै विधेयकले संविधानको रुप धारण गरेको हो ।संविधानको प्रतिलाई भोली पाँच बजे आयोजना हुने औपचारिक राष्ट्रिय समारोह एवम् विशेष बैठकमा राष्ट्रपति डाक्टर रामवरण यादव समक्ष सभाध्यक्षले पेश गर्नुहुनेछ । समारोहमा राष्ट्रपति यादवले संविधानको प्रतिमा हस्ताक्षर गरी नेपाली जनता समक्ष नयाँ संविधान प्रारम्भ भएको घोषणा गर्नुहुनेछ । घोषणा भएको संविधानको एकप्रति संविधानसभा सचिवालयको अभिलेखमा राखिने छ भने अरु एकएकप्रति राष्ट्रपतिको कार्यालय, प्रधानमन्त्री तथा मन्त्रिपरिषद्को कार्यालय र कानून, न्याय, संविधानसभा तथा संसदीय मामिला मन्त्रालयमा पठाइनेछ । औपचारिक समारोह पछि संविधानसभा भवन नयाँ बानेश्वर परिषरमा रात्री भोजको आयोजना गरिएको छ । रात्री भोजमा, राष्ट्रपति, प्रधानमन्त्री, संविधानसभाका अध्यक्ष, विपक्षदलका नेता, सरकारका मन्त्री, राजनीतिक दलका नेता, सभासद्, संवैधानिक निकायका प्रमुख, कुटनीतिक नियोगका प्रमुख लगायत सहभागि हुनेछन ।
संविधान घोषणा भएलगत्तै अन्तरिम संविधान, २०६३ को खारेजी र संविधानसभा स्वतः व्यवस्थापिका–संसद्मा रुपान्तरण हुने छ । नयाँ संविधानमा ३ सय ८ धारा, ३५ भाग र नौ अनुसुची छन । यसैबीच दिउँसो तीनबजे बस्ने व्यवस्थापिका संसदको बैठकमा भूकम्पपछिको पुर्ननिर्माण गर्न बनेको विधेयकका विषयमा छलफल हुनेछ ।
