संविधानसभाको आजको बैठक ११ बजे बस्ने, परिमार्जित विधेयकमा मतदान हुने
काठमाडौं, २८ भदौ । संविधानसभाको आजको बैठकमा पनि संविधानको परिमार्जित विधेयकका हरेक धारा पारित गर्न मतदान हुने भएको छ । बिहान ११ बजे संविधानसभा भवन नयाँ बानेश्वरमा बस्ने बैठकमा आज धारा चारबाट पारित गर्न थालिने छ । हरेक धारा पारित गर्नका लागि संविधानसभाका कुल सदस्यको कम्तिमा पनि दुईतिहाइ संख्या हुनुपर्नेछ । २ सय ९७ धारा पारित गर्नका लागि आज र भोली समय लाग्नसक्ने अनुमान संविधानसभा सचिवालयले गरेको छ । आजको बैठक बिहान ११ बजे बसेर बीचमा ब्रेक गरेर फेरि बेलुकी सात बजेसम्म बस्नेगरी तय गरिएको संविधानसभा सचिवालयका सहप्रवक्ता सुदर्शन कुँइकेलले जानकारी दिनुभयो ।आज पारित गर्न नसकिएका धारालाई भोलीफेरि पारित गरिनेछ । हरेक धारा छुट्टा छुट्टै पारित गरेपछि संविधानका सबै धारा एकमुष्ठ पारित गर्नुपर्ने संविधानसभा नियमावलीमा उल्लेख छ । नियमावली अनुसार हरेक सभासद्ले हस्ताक्षर गरेर हुन्छ या हुँदैन भन्ने विषयमा मतदान हुनेछ । एकमुष्ठ धाराहरु पारित भएपछि त्यसको एकमुष्ठरुपमा फेरि सभासद्ले हस्ताक्षर गर्नेछन । कम्तिमा दुईतिहाई सभासद्बाट हस्ताक्षर भएको संविधानको प्रारुपलाई संविधानसभा अध्यक्ष सुवासचन्द्र नेम्वाङ्गले प्रमाणिकरण गर्नु हुनेछ । यी सबै प्रकृयासक्नका लागि पर्सिसम्मको समय लाग्ने सचिवालयले अनुमान गरेको छ । संविधानसभा अध्यक्षले प्रमाणिकरण गरेको संविधानलाई राष्ट्रपति डाक्टर रामवरण यादवले संविधानसभामै सार्वजनिक गर्नुहुनेछ । राष्ट्रपतिले सार्वजनिक गरेपछि नेपालको संविधान २०७२ लागु हुनेछ भने संविधानसभा संसदमा रुपान्तरण हुनेछ । जनआन्दोलनपछि झण्डै एक दशकमा नागरिकको चाहना अनुसार नयाँ संविधान आउने सुनिश्चित भएको छ । नेपालमा विक्रम संवत २००७ सालदेखि संविधानसभाबाट संविधान बनाउने कुरा उठेपनि यस पटक मात्र संविधान सुनिश्चित भएको छ ।
