दुर्घटनामा २ जनाको मृत्यु

काठमाडौं, ४ असोज । काठमाडौं उपत्यकामा गएराती भएका दुर्घटनामा दुई जनाको मृत्यु भएको छ ।  ललितपुरको हरिसिद्धिबाट सातदोबाटोतर्फ आउँदै गरेको बा ६९ प ५१४१ नम्बरको मोटरसाइकल अनियन्त्रित भई बिजुलीको पोलमा ठोक्किँदा ललितपुर इमाडोल बस्ने २५ बर्षीय आशिष रावतको मृत्यु भएको हो ।

 गम्भीर घाइते रावतको पाटन अस्पतालमा उपचारका क्रममा मृत्यु भएको महानगरीय ट्राफिक प्रहरी महाशाखाले जनाएको छ । मोटरसाइकलमै बसेका अन्य २ जना गम्भीर घाइते भएका छन् ।

काभ्रेका २१ बर्षीय बिष्णु केसी र ललितपुर हात्तीवनका २३ बर्षीय नेत्रबहादुर थापाको पाटन अस्पतालमा उपचार भइरहेको छ ।

यसैबीच, गएराति १ बजे बालाजुको ढुंगेधारमा निजी कारको ठक्करबाट एक पैदल यात्रीको मृत्यु भएको छ । बालाजुबाट कलंकी जाँदै गरेको बा १२ च ८३५० नम्बरको कारले ठक्कर दिँदा गम्भीर घाइते उनको त्रिवि शिक्षण अस्पताल महाराजगंजमा उपचारका क्रममा मृत्यु भएको हो । मृतकको पहिचान खुलेको छैन ।