पुलिसलाई मोरङले रोक्यो

काठमाडौ, १९ असोज । राष्ट्रिय लिग फुटबलमा मोरङ फुटवल क्लवले नेपाल पुलिसलाई एक–एक गोलको बराबरीमा रोकेको छ  । एन्फा कम्प्लेक्स सातदोबाटोको मैदानमा भएको खेलमा ७६ औं मिनेटमा योगेश श्रेष्ठले गोल गर्दै पुलिसलाई सुरुवाती अग्रता दिलाए पनि पुलिसले त्यसलाई जोगाउन सकेन् ।

अन्तिम समयमा मोरङका निरज बस्नेतले गोल गरेर खेललाई १–१ को बराबरीमा पुर्याउँदै पुलिसलाई अंक बाँड्न बाध्य बनाए । दुवै टोली उपाधि होडबाट बाहिरिएका छन् । बराबरीपछि पुलिस १४ खेलबाट १३ अंक सहित लिगको सातौ स्थानमा यथावत छ भने १५ खेलबाट ७ अंक जोडको मोरङ पुछारमा छ ।

लिगमा १३ खेलबाट २६ अंक जोडेको थ्रीस्टार क्लब शीर्ष स्थामा छ । समान १३ खेलबाट २४–२४ अंक बटुलेका त्रिभुवन आर्मी र झापा–११ दोस्रो र तेस्रो स्थानमा छन् । एक खेल कम खेलेको मनाङ–मर्स्याङ्दी २२ अंकका साथ चौथो स्थामा रहँदा २० अंक जाडेको सशस्त्र प्रहरी पाँचौ स्थानमा छ ।